എന്താണ് സോമലത ?

🔵 രമ്യ അരസി  സോമലത പുരാതന ഭാരതീയ ഋഷിവര്യന്മാരുടെ ഒരു ദിവ്യൗഷധിയായിരുന്നു . ഋഗ്വേദത്തിൽ 'സോമ'യെപ്പറ്റി പരാമർശിച്ചിരിക്കുന്നത്...

🔵 രമ്യ അരസി 

സോമലത പുരാതന ഭാരതീയ ഋഷിവര്യന്മാരുടെ ഒരു ദിവ്യൗഷധിയായിരുന്നു . ഋഗ്വേദത്തിൽ 'സോമ'യെപ്പറ്റി പരാമർശിച്ചിരിക്കുന്നത് വളരെ ശ്രദ്ധേയമാണ് . ശരീരത്തിന് പൂർണ ആരോഗ്യവും ദീർഘായുസ്സും പ്രദാനം ചെയ്യാൻ സോമരസത്തിനുള്ള കഴിവ് വളരെ പ്രകീർത്തിക്കപ്പെട്ടിട്ടുണ്ട് . അതിലുമുപരി മരണത്തിന് ഭയമുള്ളത് 'സോമരസത്തെ ' മാത്രമാണ് എന്ന വിശ്വാസം പോലും നിലനിന്നിരുന്നു .സോമലതയുടെ ഗുണം അമൃതിന് തുല്യമാണെന്നാണ് പ്രകീർത്തിക്കപ്പെട്ടിരിക്കുന്നത് . വെള്ളത്തിലും കരയിലും വളരുന്ന ഇരുപത്തിനാല് തരം സോമലതകളെപ്പറ്റി സുശ്രൂതൻ വിവരിച്ചിട്ടുണ്ട് .ഉൽപ്പത്തിസ്ഥാനം ,നാമം, ആകൃതി ,വീര്യം എന്നിവയുടെ അടിസ്ഥാനത്തിലാണ് ഇരുപത്തിനാല് തരമായി സുശ്രുതൻ വർഗീകരണം നടത്തിയിരിക്കുന്നത് .

പുരാണങ്ങളിൽ വിവരിക്കപ്പെട്ടിട്ടുള്ള ഹിമാലയം ,സഹ്യൻ ,മഹേന്ദ്രം ,വിന്ധ്യൻ ,ദേവഗിരി ,മലയം ,ശ്രീപർവ്വതം എന്നീ പർവത സാനുക്കളിലും നദികളുടെയും ജലാശയങ്ങളുടെയും അടിത്തട്ടിലും സോമലതയക്ക് വളരാൻ കഴിവുണ്ടെന്ന് പറയുന്നു . ചരകസംഹിതയിൽ പറയുന്നു - എല്ലാ സോമലതകൾക്കും പതിനഞ്ച് ഇലകൾ വീതമേ കാണു . അവയുടെ കിഴങ്ങിലും വള്ളിയിലും പാലുണ്ടായിരിക്കും ,ഇലകൾ ചന്ദ്രനെപ്പോലെ ക്ഷയ - വൃദ്ധി സ്വഭാവമുള്ളതായിരിക്കും , അതായത് വെളുത്തപക്ഷത്തിലെ പ്രതിപദം മുതൽ ഓരോ ഇലയായി വർദ്ധിച്ച് പൗർണമിയാകുമ്പോഴേക്കും പതിനഞ്ച് ഇലകൾ ഉണ്ടാകും . കറുത്തപക്ഷത്തിലെ പ്രതിപദം മുതൽ ഓരോ ഇല കൊഴിഞ്ഞ് അമാവാസിയാകുമ്പോഴേക്കും ഇലകൾ പൂർണമായി അപ്രത്യേക്ഷമാകും . ഇത്തരമൊരു പ്രതിഭാസം സോമലതകളുടെ പ്രത്യേകതയായി വിവരിക്കപ്പെട്ടിരിക്കുന്നു .

അടുത്ത കാലത്തായി സോമലതയോട് സാദൃശ്യമുള്ള പല ചെടികളെയും യഥാർഥ സോമലതയായി സമർഥിക്കാൻ പല ഗവേഷകരും ശ്രമിച്ചിട്ടുണ്ട് . അതിൽ പ്രധാനപ്പെട്ട ഒരു സസ്യമാണ് അസ്ക്ലിപിയഡേസീ സസ്യകുടുംബത്തിലെ '' സാർക്കോ സ്റ്റെമ്മ ബ്രവിസ്റ്റഗ്മ '' .ഇത് സോമയായി കരുതുവാനുള്ള പ്രധാന കാരണം പതിനെഞ്ച് ഇലകളും ഇലകളുടെ വൃദ്ധി - ക്ഷയ സ്വഭാവവുമാണ് . സോമയാഗം നടത്തുമ്പോൾ 'സോമ'യായി യാഗത്തിന് എടുക്കുന്നതും ഈ ഔഷധിയാണ് .