വർണ്ണോത്സവം-2020

തിരുവനന്തപുരം:   പ്രതീക്ഷകൾക്ക് കടുത്ത വർണ്ണ വസന്തം കിട്ടിയാൽ അതിനെ നമുക്ക് 'ചിത്രമാല' എന്നു വിളിക്കാം. നിറയെ നന്മകളുള്ള ഒരു നാട...

തിരുവനന്തപുരം:  പ്രതീക്ഷകൾക്ക് കടുത്ത വർണ്ണ വസന്തം കിട്ടിയാൽ അതിനെ നമുക്ക് 'ചിത്രമാല' എന്നു വിളിക്കാം. നിറയെ നന്മകളുള്ള ഒരു നാട്ടിൻപുറത്തു ജനിക്കുകയും സ്വപ്രയത്നം കൊണ്ട് തൻ്റെ മാത്രമല്ല, കൂടെയുള്ളവർക്കും ആത്മവിശ്വാസവും കരുത്തും നന്നായി ജീവിക്കാമെന്നുമുള്ള പ്രതീക്ഷയും പുതു തലമുറകൾക്കു കൂടി നൽകാൻ കഴിയുകയെന്നത് തീരെ ചെറിയ കാര്യമല്ല. ജീവിതത്തിൻ്റെ സമ്മർദ്ദങ്ങളിൽ നിന്നും വിട്ടകന്ന് സ്വാതന്ത്ര്യത്തോടും സ്വപ്നസാക്ഷാത്കാരത്തോടും കൂടെ ജീവിതം ആഘോഷമാക്കുന്ന ഒരു കൂട്ടം ചിത്രമനസ്സുകളുടെ സ്നേഹക്കൂട്ടായ്മയാണ് ആലപ്പുഴ ജില്ലയിലെ നൂറനാടുള്ള 'ചിത്രമാല ഇൻസ്റ്റിറ്റ്യൂട്ട് ഓഫ് ആർട്സ്& ക്രാഫ്ട്സ്.' മ്യൂറൽ ചിത്രകല ഉൾപ്പടെയുള്ള ചിത്രകലയിലെ സാധ്യമായ എല്ലാ സങ്കേതങ്ങളും തങ്ങളാലാവും വിധം ഈ കലാകാരകൂട്ടായ്മ പരീക്ഷിക്കുന്നു. ചിത്രകലാ അധ്യാപികയായുള്ള 35 വർഷത്തെ സേവനത്തിനുശേഷം ശ്രീമതി വത്സല ജയചന്ദ്രൻ രൂപം നൽകിയ ചിത്രകലാസ്ഥാപനമാണ് 'ചിത്രമാല.' നാഷണൽ സ്കിൽ ഇൻഡ്യ മിഷൻ്റെ അംഗീകൃത സ്കിൽ ട്രയ്നിംഗ്& ടെസ്റ്റിംഗ് സെൻ്റർ ആയി അംഗീകാരം ലഭിച്ച ഈ സ്ഥാപനത്തിൽ മ്യൂറൽ പെയിൻ്റിംഗ് കൂടാതെ സാരി ഡിസൈനിംഗ്, നെട്ടിപ്പട്ട നിർമ്മാണം, ഗ്ലാസ് പെയിൻ്റിംഗ്, പോട്ട് പെയിൻ്റിംഗ് തുടങ്ങിയവയിലെല്ലാം മികച്ച പരിശീലനം നൽകി വരുന്നുണ്ട്.

കോട്ടയം കേന്ദ്രമാക്കി പ്രവർത്തിക്കുന്ന ഫ്രീലാൻസ് ചിത്രകാരിയും, ഇലസ്റ്റ്രേറ്ററും, അറിയപ്പെടുന്ന കാർട്ടൂണിസ്റ്റുമാണ് ശ്രീമതി രമാദേവി. പ്രകൃതിയുടെ മടിത്തട്ടിലും സൗന്ദര്യത്തിലും നിശബ്ദതയും സമാധാനവും കണ്ടെത്തുവാൻ ശ്രമിക്കുന്ന കലാകാരിയാണവർ. ചിത്രകലയെപ്പോലെ തന്നെ ഫോട്ടോഗ്രഫിയേയും ഇഷ്ടപ്പെടുന്ന ആ മനസ്സും സ്വന്തമായുള്ള ഇടങ്ങളിൽ വ്യാപരിക്കുവാനാണ് ഇഷ്ടപ്പെടുന്നത്.മ്യൂറൽ ചിത്രകലയോടുള്ള അടുപ്പമാണ് ശ്രീമതി രമാദേവിയെ 'ചിത്രമാലയിലെ വത്സലടീച്ചറുടെ അടുക്കൽ എത്തിക്കുന്നത്. മുന കൂർപ്പിച്ച കാർട്ടൂണുകൾക്കൊപ്പം സൗമ്യമായ ചിത്രങ്ങളും ഈ കലാകാരിയിൽ നിന്നും ആസ്വാദകമനസ്സുകൾ ഏറ്റുവാങ്ങിയിട്ടുണ്ട്.

ജനുവരി 9 മുതൽ 12 വരെ ഈ സർഗ്ഗമാനസങ്ങളെ നമുക്ക് അടുത്തുകിട്ടുന്നു. വർണ്ണോത്സവം-2020 എന്ന ശീർഷകത്തിൽ തിരു. മ്യൂസിയം ആഡിറ്റോറിയത്തിൽ സംഘടിപ്പിക്കുന്ന പ്രദർശനം മലയാളത്തിൻ്റെ പ്രിയ ചിത്ര- ചലച്ചിത്രകാരനും കേരള ലളിത കലാ അക്കാദമി ചെയർമാനുമായ ശ്രീ. നേമം പുഷ്പരാജ് ഉദ്ഘാടനം നിർവഹിക്കുന്നു. തദവസരത്തിൽ ഈ കലാകാരികൾക്ക് അനുഗ്രഹവർഷം ചൊരിഞ്ഞുകൊണ്ട് പ്രിയപ്പെട്ട സർഗ്ഗസാന്നിധ്യമായി ലളിതകലാ അക്കാദമി ഭരണസമിതിയംഗം ശ്രീ. കാരയ്ക്കാമണ്ഡപം വിജയകുമാർ, വൈലോപ്പിള്ളി സംസ്കൃതിഭവൻ വൈസ് ചെയർമാൻ ശ്രീ. വിനോദ് വൈശാഖി, പ്രശസ്ത ചിത്രകാരന്മാരായ ശ്രീ. ജോർജ്ജ് ഫെർണാൻ്റസ്, ശ്രീ. രവീന്ദ്രൻ പുത്തൂർ എന്നിവർ സന്നിഹിതരാവും.

വർണോത്സവം 2020 മനോരമ ന്യൂസ് റിപ്പോർട്ട്